Bachelor në Punë Sociale

Objektivat dhe veprimtaritë formuese të programit të studimit

Programi i studimit “Bachelor në Punë Sociale ” është program i ciklit të parë të studimeve universitare. Ky program organizohet me 180 kredite ECTS, ofrohet me kohë të plotë, me kohëzgjatje akademike 3-vjeçare. Studimet në këtë program ofrohen në gjuhën shqipe. Ky program studimi i takon nivelit të 6-të të studimeve sipas Kornizës Shqiptare të Kualifikimeve. Në përfundim të studimeve lëshohet “Diplomë Bachelor në Punë Sociale”.

Programi i studimit është hartuar mbështetur në përvojën e deritanishme në formimin dhe edukimin e punonjësve socialë në vend dhe Standardet Globale për Edukimin dhe Trajnimin e Punonjësve Socialë të përpunuar nga Shoqata Ndërkombëtare e Punonjësve Socialë. Nëpërmjet një kurrikule ndërdisiplinore programi i ofron studentëve të diplomuar një formim të përgjithshëm në punën sociale, i njeh me specializimet dhe degëzimet e mëtejshme të profesionit të punës sociale dhe i aftëson me shprehitë e teknikat e nevojshme për të punuar në sektorin e shërbimeve sociale.

Misioni i programit të studimit “Bachelor në Punë Sociale” është mbulimi i nevojave ekzistuese dhe ato të parashikuara të punës sociale në sektorin publik dhe privat, duke ofruar: Përgatitje të specialistëve në fushën e punonjësve socialë; thellim të njohurive të studentëve, duke mundësuar përgatitje të avancuar të tyre për formimin e kompetencave dhe aftësive që i korrespondojnë niveleve të kualifikuara të punësimit dhe të profesionalizmit; dije për kërkim të pavarur nëpërmjet njohjes së metodave, instrumenteve e teknikave të kërkimit.

Mundësia për studime të mëtejshme

Sistemi i njohurive që ofrohet nga ky program dhe aftësitë që fitojnë studentët nëpërmjet tij, u mundësojnë atyre të ndjekin një karrierë profesionale, akademike ose kërkimore, nëpërmjet vazhdimit të studimeve universitare në ciklin e dytë, në programet master profesional ose master i shkencave në fushën e punes sociale, ose në programe studimi të integruara.

Mundësitë e punësimit dhe të kualifikimit profesional

Studenti, i cili zotëron “Diplomë Bachelor në Pune Sociale” mund të punësohet në sistemin publik e privat të sektorit të shërbimeve sociale, si dhe si bashkëpunëtorë të strukturave jofitimprurëse që japin shërbime të drejtpërdrejta për qytetarin.